An galaksiya (Ingles: galaxy) iyo sarong sistemang grabitasyunal nin mga bitoon, natada nin mga nagadang bitoon, inter-istelar na gas, alpog, sagkod madiklom na materya.[1][2] An taramong galaksiya iyo gikan sa Griyegong galaxias (γαλαξίας), literal na kahulugan "magatas", na iyo sarong reperensya sa Milky Way. An mga galaksiya iyo may rango nin sukol na poon sa mga "unano" na may kadikit na gatos na milyong (108) bitoon hasta sa mga higante na may sarong gatos na trilyong (1014) bitoon,[3] na an lambang saro iyo minaikot sa sentrong masa kan galaksiya.
An mga galaksiya iyo nakakategorisa segun sa saindang biswal na morpolohiya bilang eliptikal,[4] ispiral, o iregular.[5] Nagkapirang mga galaksiya an pighohona na igwang magabatong maray na mga black hole sa saiyang tahaw. An tahaw na black hole kan Milky Way, bistado bilang Sagittarius A*, iyo mas magabat nin apat na milyong beses kaysa sa Saldang.[6] Hasta kan Marso 2016, an GN-z11 iyo an pinakagurang asin an pinakaharayong galaksiyang naobserbahan. Igwa ini nin rayo na 32 bilyong liwanag-taon hale sa Kinaban, sagkod iyo pinagtutubudang namokna 400 milyong taon pagkatapos kan Big Bang.
Kan 2021, an datos hale sa NASA New Horizons space probe an ginamit para liwaton an nagligad na estimasyon nin 2 trilyong galaksiya pasiring sa harus 200 bilyong galaksiya (2 x 1011).[7] Pigsundan ini kan estimasyon kan 2016 na igwang duwang trilyon ( 2 x 1012) o mas dakul pang[8] galaksiya sa nahihiling na uniberso, sa kabilugan, mga harus (1 x 1024) na bitoon[9][10] (mas dakul pang bitoon kaysa sa mga granyula nin baybay sa planetang Kinaban).[11] An kadaklan nin mga galaksiya iyo 1,000 hasta 100,000 parsecs sa diyametro (harus 3,000 hasta 300,000 liwanag-taon) sagkod iyo nasusuway sa distansya nin order kan milyon nin parsecs (o megaparsecs). Bilang pagkompara, an Milky Way iyo may diyametro na dae mababa sa 30,000 parsecs (100,000 ly) sagkod iyo dae nasusuway sa Andromeda Galaxy, an pinakaharani niyang kataid, nin 780,000 parsecs (2.5 million ly.)
An espasyo sa tahaw nin mga galaksiya iyo napapano nin mga tenyosong gas (an intergalaktikong medyum) na igwang medyang densidad na mas hababa sa sarong atomo kada kubikong metro. An mayorya sa mga galaksiya iyo grabitasyunal na naorganisa sa mga grupo, klaster, asin superklaster. An Milky Way iyo parte kan Local Group, kun sain ini iyo minadomina kaiba an galaksiyang Andromeda. An grupo iyo parte kan Virgo Supercluster. Sa pinakadakulang sukol, an mga asosasyong ini iyo nakaorganisa sa mga sheets sagkod pilamento na napapalibotan nin dakulang espasyo.[12] Parehas an Local Group sagkod an Virgo Supercluster na yaon sa mas dakula pang kosmikong istraktura na may ngarang Laniakea.[12]
© MMXXIII Rich X Search. We shall prevail. All rights reserved. Rich X Search