Buku

Buku adalah kumpulan/himpunan kartas atawa bahan lainnya nang dijilit jadi sabuting di salah asa hujungnya wan baisi tulisan, gambar, atawa tikapan. Saban higa matan sabuting lambaran kartas di buku disambat sabuting tungkaran.

Saimbai lawan pakambangan dalam bidang dunia pamaklumatan, damini dipinandui jua istilah e-book atawa buku-il (buku iliktrunik) nang mangandalakan parangkat kaya kumputar mija, kumputar jinjing, kumputar tablit, talipun salulir wan lainnya, wan jua mamakai pakakas bayut tatantu gasan mambacanya.

Dalam basa Indunisia tadapat kata "kitab" nang disarap matan basa Arap (كتاب) nang baisi arti "buku". Imbah ngitu pada pamakaian kata ngitu, kata kitab ditujuakan wastu gasan sabuah tiks atawa tulisan nang dijilit jadi sabuting. Rancaknya kitab marujuk ka janis tulisan kunu nang baisi katatapan hukum atawa lawan kata lain adalah undang-undang nang maatur. Istilah kitab rancaknya dipakai gasan manyambat karia sastra bubuhan pujangga wayah bahari nang kawa dijadiakan sawagai bukti sajarah gasan maungkapakan sabuting kajadian masa halam kaya halnya kitab suci. Karajaan-karajaan di Nusantara wayah masa halam mambari kadudukan nang panting ka bubuhan pujangga gasan mangisahakan kahidupan wan kakuasaan raja-raja wayah ngitu gasan diriwayatkan lawan cara tatulis.