Scozia

A Scozia (in inglese è scots: Scotland; in gaelicu scuzzese: Alba) hè una Nazione senza Statu è una di e quattru nazione custitutive di u Regnu Unitu. U Riame di Scozia fubbe un Statu suvranu insin'à u 1 di maghju di u 1707, data à a quale l'Attu d'Unione l'unificò incù u Riame d'Inghilterra per crià u Riame di Grande Brittagna. Occupendu u nordu di a Grande Brittagna, a Scozia cumprende un inseme di picculi arcipelaghi frà i quali l'Ebride, l'Orcade o e Shetland. Hè dinù una di e sei nazione celtiche.

A so capitale, centru finanziariu è amministrativu, hè Edimburgu, ma a più grande cità hè Glasgow, chì hè sturicamente a a più cità industriale di u paese. L'altre cità maiò sò Aberdeen è Dundee, suvitate da Stirling, Perth è Inverness.

A riligione chì ci hè a più sparta hè u cristianesimu.^[1] Esiste una grande diversità di dinuminazione, ma a Chjesa a più impurtante hè a Chjesa di Scozia, una Chjesa rifurmata presbiteriana, suvitata da a Chjesa cattolica. Bon parechji Scuzzesi sò per altru atei. Duie lingue regiunale sò ricunnusciute : u gaelicu scuzzese è u scots^[2].

Puliticamente, a Scòzia hè marcata da un forte muvimenttu indipendentistu. Dopu à l'elezzione legislative di u 2007, u Partitu Naziunale Scuzzese (Scots Naitional Pairty, SNP) hà furmatu u prima guvernu indipendentistu (ma minuritariu) di a storia di Scozia. À u mumentu di l'elezzione di u 5 di maghju di u 2011, u SNP ottense a maiuranza assoluta di i sedii (69 annantu à u 129^[3]) è, u 15 di uttrove di u 2012, u prima ministru David Cameron firma un accordu purtendu annantu à l'organisazione in u 2014 d'un referendum annantu à l'indipendenza di a Scozia. Quellu si svoglie u 18 di sittembre di u 2014 incù una larga participazione è cunduce à u ricusu di l'indipendenza di a Scozia incù 55,3% di l'elettori^[4],^[5].

1. ↑ Riligione in Scozia
2. ↑ Lingue parlate in Scozia
3. ↑ Cunsequenza di l'elezzione di u 5 di maghju di u 2011
4. ↑ Referendum annantu à l'indipendenza di a Scozia in u 2014.
5. ↑ [1]