Regiona ligo unuavice estas ligo inter pluraj distriktoj, urboj kaj / aŭ komunumoj, kiu plenumas komunajn taskojn de la konstituantoj, ekz. en la urboplanado, vojplanado, la publika transporto, la medioprotekto aŭ la ruboforigo.
Regionaj ligoj ekzistas i.a. en Germanio, ekz. en la federacia lando Nordrejn-Vestfalio, kiu dividiĝas al la grandaj regionoj Rejnlando (sude kaj okcidente) kaj Vestfalio-Lipo (norde kaj oriente). La membreco en la regionaj ligoj (germane Landschaftsverband) Rejnlando respektive Vestfalio-Lipo estas deviga por la distriktoj kaj eksterdistriktaj urboj. La taskoj de regionaj ligoj de administraj komunumoj varias. Ekzemple en Nordrejn-Vestfalio ili kompetentas pri planado de aŭtoŝoseoj, monumentoprotekto, specialaj malsanulejoj ktp. Ekzemplo por libervola ligo estas la regiona ligo Ruhr, en kiu membras la urboj kaj distriktoj de la industria Ruhr-regiono. En la pli norda federacia lando Malsupra Saksio la taskoj de la regionaj ligoj de administraj komunumoj estas multe malpli ampleksaj ol en Nordrejn-Vestfalio kaj pli-malpli limiĝas al kulturaj taskoj, aparte la vivteno de lokaj kulturaj tradicioj.
Duavice ankaŭ iuj regionaj ligoj de sociaj organizoj, ekzemple regiona Esperanto-ligo, falas sub tiun difinon, kvankam temas pri alispeca ligo ol unuiĝo de subŝtatoj.
© MMXXIII Rich X Search. We shall prevail. All rights reserved. Rich X Search