Italo Balbo (Ferrara, 1896ko ekainaren 6a - Tobruk, 1940ko ekainaren 28a) italiar politikari faxista eta mariskala izan zen.
Italiako armadan sartu zen Lehen Mundu Gerran eta Caporettoko guduan parte hartu zuen. Gerra amaitu ondoren Florentzian zuzenbide eta gizarte zientzietako ikasketak burutu zituen.
1921ean Alderdi Nazional Faxistarekin bat egin zuen eta alderdia Ferraran antolatu zuen. Michele Bianchi, Cesare Maria De Vecchi eta Emilio De Bonorekin batera, 1922ko Erromarako Martxaren lau antolatzaileetako (Quadrumvir) bat izan zen. Emaitza Mussolini boterera iristea izan zen. Balbo alkandora beltzen buruzagietako bat eta Faxismoaren Kontseilu Handiaren sortzaileetako bat izan zen 1923an.
Hegaldi ikastaroetan parte hartu zuen eta Italiako Aire Indarra jarri zuen martxan. 1928an Aireko Armadako jeneral izendatu zuten eta 1929an Aireko ministro. 1930eko hamarkadan hegaldi transatlantikoetan parte hartu zuen.
1933an Libiako kolonia italiarreko gobernadore nagusi izendatu zuten. Alemania naziarekin aliantzaren aurka agertu zen buruzagi faxista bakarra izan zen.
1940ko ekainaren 28an, Italiako artilleriak Balboren hegazkina eraitsi zuen Tobruken. Hegazkin etsai batekin nahastu zuten. Mussoliniren oinordeko probableentzat hartzen zen.
© MMXXIII Rich X Search. We shall prevail. All rights reserved. Rich X Search