Kansas

Steat Kansas State of Kansas
flagge	wapen
Ad astra per aspera (Latyn, "Nei de stjerren dwers troch swierrichheden")
lokaasje yn de Feriene Steaten
algemien
ôfkoarting	KS
lân	Feriene Steaten
status (jier)	steat (1861)
haadstêd	Topeka
grutste stêd	Wichita
offisjele taal	Ingelsk
sifers
ynwennertal	2.904.021 (2014)
befolkingstichtens	13,5 / km²
oerflak	213.096 km² (0,6% wetter)
bykommende ynformaasje
bynamme	de Sunflower State
tiidsône	UTC –6 (of –7)
simmertiid	UTC –5 (of –6)
webside	www.kansas.gov

Dizze side giet oer de Amerikaanske steat Kansas. Foar oare betsjuttings, sjoch: Kansas (betsjuttingsside).

Kansas (Ingelske útspr.: ['kæ:nzǝs], likernôch "kênz's"), offisjeel de Steat Kansas (Ingelsk: State of Kansas), is ien fan 'e fyftich steaten dy't mei-inoar de Feriene Steaten fan Amearika foarmje. Kansas, byneamd de Sunflower State (de "Sinneblomsteat"), leit yn 'e midden fan 'e Feriene Steaten op 'e Grutte Flakten, en heart ta de regio fan it Amerikaanske Midwesten. De haadstêd is Topeka, mar de grutste stêd is Wichita. Neffens in skatting út 2014 hie de steat doe likernôch 2,9 miljoen ynwenners, wêrmei't it kwa befolkingsgrutte de 34e steat fan 'e Feriene Steaten is. Oangeande oerflak is Kansas mei 213.000 km² de 15e steat.

Kansas stiet bekend om syn lânbou, syn iepen prêrjes en om syn eigen lytse boargeroarloch (Bleeding Kansas), dy't foarôf gie oan 'e Amerikaanske Boargeroarloch. Ek wurdt Kansas faak sjoen as in stereotype plattelânsgebiet. Yn 'e musical The Wonderful Wizard of Oz, fan L. Frank Baum, wurdt it haadpersonaazje Dorothy tegearre mei har hûntsje Toto troch in tornado út Kansas wei oerbrocht nei de fiktive wrâld fan it Lân fan Oz. Dorothy har útspraak: "No, we binne net mear yn Kansas, Toto," is sprekwurdlik wurden foar as men ûnferwachtse nuverichheden tsjinkomt.