Slach oan de Little Bighorn

Slach oan de Little Bighorn (ûnderdiel fan 'e Grutte Sû-Oarloch fan 1876) The Custer Fight, troch Charles Marion Russell út 1903. datum: 25 – 26 juny 1876 plak: oan 'e igge fan 'e rivier de Little Bighorn, yn súdlik Montana útkomst: Yndiaanske oerwinning konfliktpartijen Lakota Westlike Dakota Eastlike Dakota Noardlike Sjajinnen Noardlike Arapaho Feriene Steaten Arikara Krieën befelhawwers Sittende Bolle Mâl Hynder Gal John Grass Amerikaansk Hynder Twa Moannen Kreupele Blanke Man † Tsjeppe Noas George A. Custer † Marcus Reno Frederick Benteen Myles Keogh † Thomas Custer † James Calhoun † Charles Varnum Thomas McDougall sterkte ±2.000 647 ferliezen 136 deaden 160 ferwûnen 280 deaden 57 ferwûnen kaart Lokaasje fan 'e Slach oan 'e Little Bighorn yn 'e Amerikaanske steat Montana.

De Slach oan de Little Bighorn wie in fjildslach dy't op 25 en 26 juny 1876 útfochten waard oan 'e igge fan 'e rivier de Little Bighorn yn wat no it suden fan 'e Amerikaanske steat Montana is. Dit treffen hearde ta de Grutte Sû-Oarloch fan 1876, wêrby't de Feriene Steaten definityf in ein makken oan 'e selsstannichheid fan 'e Yndiaanske folken yn it noardlike part fan 'e Grutte Flakten. Yn dat ramt wie de Slach oan 'e Little Bighorn lykwols in slimme tebeksetter, mei't dat treffen útrûn op in klinkende oerwinning foar de Yndianen.

Yn dizze fjildslach foel it Amerikaanske 7e Kavaleryrezjimint ûnder lieding fan luitenant-kolonel George Armstrong Custer in Yndiaansk doarp oan dêr't tafalligerwize in grut part fan 'e oarlochssterkte fan 'e Sû (Sioux), Sjajinnen (Cheyenne) en Arapaho gearkommen wie. Ynspirearre troch de fizioenen fan 'e medisynman Sittende Bolle, en oanfierd troch de opperhaden Mâl Hynder en Gal, sloegen de Yndianen de oanfal fan 'e troepen fan majoar Marcus Reno op 'e suderein fan harren doarp ôf, wêrnei't se oan 'e noarderein de oanfal fan Custer sels brieken noch foar't dy goed en wol begûn wie. De fiif kompanjyen kavalery fan Custer waarden doe op in heuveltop besingele en oan 'e lêste man ta útrûge. De troepen fan Reno waarden ek besingele, mar koene nei twa dagen ûntset wurde troch Amerikaanske fersterkings. Yn totaal kamen der 268 Amerikanen om, wat de Slach oan de Little Bighorn ta ien fan 'e swierste nederlagen makke dy't de Amerikanen ea tsjin 'e Yndianen litten.