Arma nuclearia sunt arma quae vim exitiosam ex reactionibus nuclearibus, aut sola fissione, aut simul fissione, simul fusione, trahunt. Quae ambo vastas energiae summas ex parvis rerum corporearum summis resolvunt. Prioris talium pyrobolorum generis bomba atomica fuit, alterius vero bomba hydrogenica vel thermonuclearis, cum superiora armorum genera vim ex reactionibus chemicis traxerint, atomis ipsis minime mutatis. Nuclearia arma ita ut biologica et chemica arma inter arma eversionis latissimae numerantur.
Armis nuclearibus incensis fit reactio catenata, qua tanta vis caloris, pressionis et radiationis solvitur, ut haec arma brevissime totas urbes incendio absumere et maximas hominum multitudines interficere possint. Superstites vero radiis displodendo solutis obnoxii morbo radioso, qui dicitur, afficiantur et graviter laedantur. Pluvia nuclearis latas regiones radioactivitate contaminet, quo fieri possit, ut pro quodam temporis spatio aut in perpetuum fiant inhabitabiles.
Nuclearia arma inventa necessario immutaverunt bella gerenda. Postquam enim Civitates Foederatae Americae primas bombas atomicas confecerunt, die 16 Iulii anno 1945 primo proficienter probaverunt, diebus autem 6 et 9 Augusti eiusdem anni in Iaponicis urbibus Hirosimae et Nagasacii funditus evertendis plura centena milia hominum interfecerunt, ea arma nullis iam in bellis adhibita sunt. Cum autem etiam Unio Sovietica anno 1949 arma nuclearia confecisset, bellum frigidum, quod dicitur, ortum est et in armis conficiendis certamen inter Civitates Foederatas Americae et Unionem Sovieticam eo pervenit, ut hae civitates aliquando 70 000 globos nucleares possederint.[1] Plurimi putant metum mutuo oblatum illo tempore prohibuisse, quin bellum manifestum inter utramque civitatem nasceretur. Paulatim vero et aliae civitates arma nuclearia fabricaverunt. Usque ad hos dies novem civitates arma nuclearia adeptae sunt: Civitates Foederatae Americae, Russia, Britannia Maior, Francia, Res publica popularis Sinarum, Israel, India, Pakistania, Corea Septentrionalis.
Quibus civitatibus hoc tempore omnino 16 300 fere globi nucleares per certamen armorum sunt.[2] Quae sufficiunt ad omnem hominum generationem pluries interficiendam, quod Anglice appellant overkill. Ut horum armorum diffusio prohibeatur et eo modo orbis terrarum ab eis securior fiat, multi in gravissimis muneribus huius saeculi ducunt. Quamvis abolitio armorum nuclearium adhuc frustra postulata sit, exempli gratia Pactio de armis nucleariis et Foedus de interdictione armorum nuclearium, tamen nonnulla inter gentes foedera pacta sunt, ut saltem numerus eorum diminuatur.
© MMXXIII Rich X Search. We shall prevail. All rights reserved. Rich X Search