Lingua Slovaca

Lingua Slovaca (vulgo slovenský jazyk, slovenčina), qua homines in Slovacia loquuntur, ad linguas Indoeuropaeas et ad familiam linguarum Slavicam pertinet; una cum lingua Sorabica, lingua Polabica, lingua Cassubica, lingua Polonica, et lingua Bohemica ad linguas Slavorum occidentalium spectat. Haec lingua nonnumquam etiam lingua Slovacica nuncupatur. Pater linguae Slovacae scriptae recentioris vocatur historicus et politicus Ludovicus Štúr.