Augustus

Augustus
Gebuertsnumm	C. Octavius C.f.
Gebuer	23. September 63 v. Chr. jul. Roum
Gestuerwen	19. August 14 jul. Nola
Nationalitéit	Réimescht Räich
Famill
Bestuet mat	Clodia, Scribonia, Livia Drusilla
Papp	Gaius Octavius
Mamm	Atia
Geschwëster	Octavia Minor, Octavia Maior
Kanner	Julia

Den Augustus, gebuer den 23. September 63 v. Chr. als Gaius Octavius zu Roum, a gestuerwen den 19. August 14 n. Chr. zu Nola bei Neapel, war den éischte réimesche Keeser. Säi Keesertitel war Imperator Caesar Divi filius Augustus.

Hie war de Groussneveu an Haaptierwe vum Gaius Iulius Caesar, dee 44 v. Chr. ermuert gi war, an de Gewënner vun de Muechtkämpf déi d'Folleg dervu waren. Den Augustus war vun 31 v. Chr. bis 14 n. Chr. eenzegen Herrscher vum Réimesche Räich.

Hien huet d'Devis erausgi fir d'Republik nees ze restautréieren (restitutio rei publicae), ma a Wierklechkeet huet en de Staatssystem sou ëmgewandelt, datt eng Monarchie a Form vun engem Prinzipat entstanen ass. Domat huet hien dem Joerhonnert vun de réimesche Biergerkricher en Enn gesat an d'julesch-claudesch Keeserdynastie gegrënnt.

Wärend senger Herrschaft huet Roum sech mat vill Expansiounskricher vergréissert (z. B. Egypten, oder vun der gallescher Westgrenz an den Alpen bis bei de Rhäin an d'Donau), no banne war et eng laang Friddens- a Konsolidéierungsphas, déi als Pax Augusta verkläert gouf.