Africa norde

Africa norde es un grupo de paises longo la Mar Mediteraneo en la rejion la plu norde de la continente de Africa. Alga persones dise ce lo estende de la borda atlantica de Magrib en la ueste a la Canal Suais e la Mar Roja en la este. Otras limita lo a la paises de Magrib, Jazair e Tunisia, un rejion conoseda par la franseses en la eda colonial como "Afrique du Nord", e par la arabis como "المغرب‎‎ al-Maɣréb" ("la ueste").

La defini la plu comun asetada inclui Magrib, Jazair, e Tunisia, con ance Libia e Misre. La terma "Africa norde", cuando usada comun en Africa norde e Asia sude-ueste, refere comun sola a Magrib, Jazair, Tunisia, Muritania e Libia. Misre, par causa de sua asosia plu grande con Asia sude-ueste, es comun regardada como separada. La paises de Africa norde comparti un identia cultural e lingual cual es unica de esta rejion.

La berberes ia abita Africa norde-ueste de la comensa de istoria rejistrada, en cuando la parte este de Africa norde ia es la casa de la egipsianes. Pos la concista muslim en la sentenio 7 ec, la rejion ia esperia un prosede de arabi e islami cual continua defini la cultur de la rejion.

La distingui entre Africa norde e multe de Africa susaharan es istorial e ecolojial sinifiosa par causa de la parador creada par la Deserto Sahara tra multe de istoria moderna. De 3500 aec, pos la deserti subita de la Sahara par causa de cambias gradal en la orbita de la Tera, esta parador ia separa cultural la norde de la resta de la continente. Cuando la sivilias de la fenisias, la elinicas, la romanes, la muslimes e otras ci ia pote traversa la mar ia fasili la comunica e migra traversante la Mar Mediteraneo, la cultures de Africa norde ia deveni plu prosima liada a Asia sude-ueste e Europa ca a Africa susaharan. La influe muslim en la area es ance sinifiosa, e Africa norde es un parte major de la mundo muslim.