![]() |
Quest articol chì l'è scrivud in lombard, con la Noeuva Ortografia Lombarda |
I gese ortodosse oriental inn un insema de gese cristiane che recognossen domà i prim trii concili ecumenegh e che refuden el quart, quell de Calcedonia. Donca aceten no che in Gesù ghe sien do nature ma sostegnen, cont el Cirill de Lissandria, el miafisism, o ben che el Gesù el gh'ha domà una natura, messedada in tra quella de om e quella de la parolla fada carna, ma el pensen in d'una manera men radicala rispet ai monofisista.
Inn una comenion de ses gese autocefale: la gesa ortodossa siriaca, la gesa ortodossa siriaca de Malankara, la gesa apostolega armena, la gesa ortodossa copta, la gesa ortodossa etoipa e la gesa ortodossa eritrea. Considerade conservadore in di politeghe sociai, inn propi ecumeneghe e a favor de tegnì raport cont i alter gese, tant che inn tute dent al consili ecumenegh di gese. Ghe stann adree soratut a trii rit: quell siriach ocidental, quell armen e quell lissandrin.
A inn minga de vesser sconfondude con la gesa ortodossa, che la recognoss i set concili ecumenegh e che l'è vegnuda foeura del Gran Scisma che ai ha partid de la gesa catolega, e cont i gese d'orient, che inn do gese - quella assira d'orient e quella antiga d'Orient - che vegnen de la gesa nestoriana che la sostegn che i do nature del Crist inn propi partide e minga in union ipostatega.
© MMXXIII Rich X Search. We shall prevail. All rights reserved. Rich X Search