Kok Sanak nio manajamahan sabuah artikel dari Wikipedia bahaso lainnyo ka dalam bahaso Minangkabau, ado babarapo hal nan kami sarankan untuak jadi paratian:
- Jan manggunoan masin panajamah. Mayoritas pangguno nan mamakai masin tajamahan dan indak disuntiang labiah daulu kudian lansuang dimasuakan ka Wikipedia bahaso Minangkabau, biasonyo capek dikataui. Pangguno nan basangkutan ka mandapek paringatan atau bahkan diblokir. Paralu dikana, labiah elok tajamahan ketek nan rancak daripado tajamahan panjang nan buruak.
- Tajamahan paragraf pambukak. Saumpamo wakatu Sanak tabateh, tajamahanlah paragraf pambukaknyo talabiah daulu, nan biasonyo mamuek informasi tapantiang nan paralu dikataui manganai subyek artikel ko. Paragraf pambukak adolah 1-3 paragraf partamo nan ado di awal artikel. Dalam artikel nan panjang, paragraf intro muncua sabalun daftar isi.
- Paratian gaya bahaso. Bilo manulih, paratian gaya bahaso Sanak supayo sasuai jo gaya bahaso ensiklopedia nan condong formal, obyektif, jo baku.
- Jan manajamahan kato demi kato. Indak sadoalah bahaso punyo tata bahaso nan sarupo jo bahaso Minangkabau. Dek karanonyo, ilakan manajamahan kato demi kato. Sasuaikanlah jo kalimaik nan bagaya bahaso Minangkabau.
- Rujuaklah kamus. Kok ado kato nan Sanak indak tantu atau kurang jaleh aratinyo, sarancaknyo Sanak pareso arati kato tu ka kamus. Kok kato tu indak ado dalam kamus, tulihlah kato tu manuruik caro baco bahaso Minangkabau atau bahaso Indonesia (untuak istilah teknis/kusuih, contohnyo: biology manjadi biologi), atau padia sajolah kato tu dalam bahaso asalinyo, namun dicetak miriang (italic). Kok kato tasabuik dipinjam dari bahaso Indonesia, indak paralu dimiriangkan. (Situs Kamus Indonesia-Minang, Situs Kamus KBBI)
- Cantumkan interwiki atau sumber artikel. Kok Sanak manajamahan dari artikel Wikipedia lain (misanyo bahaso Inggirih atau Malayu), cantumkanlah pautan interwiki artikel babahaso Minangkabau tu ka laman artikel dalam bahaso-bahaso lainnyo, nan lataknyo ado pado sidebar di sisi kida artikel. Baitu juo kok Sanak manajamahan artikel dari suatu situs internet lain, atau dari artikel di majalah atau buku, jan lupo cantumkan pautan ka laman sumber tu pado akia artikel.
- Salin artikel Wikipedia lain dari laman sumber. Kok Sanak manajamahan dari artikel Wikipedia lain, untuak mampatahanan format-format wiki sarato babagai pautan nan ado di laman sumbernyo, Sanak dapek manyalin artikel tu dari laman suntiangannyo (indak dari laman baconyo), jo caro maklik "edit/suntiang" dan alah tu manyalinnyo.
- Ubahlah satuan metrik asiang (mis. Inggirih) ka satuan SI. Kok Sanak manajamahan artikel dari Wikipedia Inggirih, sarancaknyo satuan-satuan metrik Inggirih/Amerika sarupo inci, mil, pound jo lain-lainnyo diubah ka satuan SI. Asianyo dapek dibulekan ka ateh atau ka bawah, indak paralu tapek bana kacuali jikok konteksnyo mamaraluan katalitian jo angko nan tapek.
- Sasuaianlah jo konteks satampek. Mayoritas pangguno Wikipedia bahaso Minangkabau adolah warga nagara Indonesia, sainggo jikok manajamahan artikel-artikel nan sensitif, tarutamo dari Wikipedia bahaso Inggirih atau lainnyo, tolong paratian jo sasuaikan isi artikelnyo. Utamonyo nan dimukasuik adolah artikel-artikel tantang agamo, budayo, sijarah, jo politik. Jan lupo pulo untuak bapacik arek pado suduik pandang netral. Anyo dek artikel tu barasa dari Wikipedia bahaso Inggirih, indak salalu indak mampunyoi masaalah. Kanalah, Wikipedia bahaso lain disuntiang juo dek sukarelawan-sukarelawan, nan takadang ado ciek-duo informasi nan indak suai nan mungkin taikuik Sanak tajamahan.
- Jan talalu picayo diri. Kok Sanak indaklah surang nan mangarati bahaso asiang tatantu sacaro lanca, mulailah jo subyek-subyek nan mudah talabiah daulu. Untuak Wikipedia bahaso Inggirih, takadang artikelnyo alah sangaik panjang sainggo manajamahannyo indak mudah. Sanak dapek mancubo mancaliak apokoh ado artikel tantang subyek nan Sanak tuju di Wikipedia bahaso Inggirih sederhana. Di sinan bahaso Inggirih nan digunoan labiah sederhana, dan dibuek untuak panyuntiang-panyuntiang nan marupokan panutua bahaso Inggirih sabagai bahaso kaduo (atau katigo).
- Sasuaian tando baco pado bilangan. Dalam bahaso Inggirih, tando baco koma digunoan untuak manandoi jumlah ribuan atau kalipatannyo. Kutiko manajamahan, gantilah koma tu jo tando titiak, saroman panulisan dalam bahaso Indonesia.
- - Misanyo: 1.000 (saribu), indak 1,000.
- Tambahkanlah {{Terjemah}} pado laman pambicaroannyo.