Paquistan

Paquistan
Bandièra Escut d'armas
Imne: قَومی ترانہ Qaumī Tarānah
Devisa: ایمان، اتحاد، نظم Īmān, Ittihād, Nazam
Capitala Islamabad 30° N, 71° E
Lengas oficialas Anglés  · Ordo
Gentilici Paquistanés, Paquistanesa
Forma de govèrn Republica islamica
President Primièr ministre Asif Ali Zardari Shehbaz Sharif
Superfícia 33en
• Totala 881 913 km²
• Aiga 2,86 %
Populacion 5en
• Totala (2024) 252 042 373 ab.
• Densitat 326 ab./km²
Moneda Ropia de Paquistan (PKR)
Fus orari UTC+5
Domeni internet .pk
Membre de ONU Commonwealth

Paquistan (prononciat [pakisˈta(n)]; en ordo: پاکستان, Pākistān [ˈpɑːkɪst̪ɑːn]), oficialament la Republica Islamica de Paquistan, (en ordo: سلامی جمہوریۂ پاکستان, Islāmi Jumhūriyāh Pākistān), es un país d'Asia dau Sud que confronta Iran, Afganistan, China, Índia e l'Ocean Indian. Independent dempuei 1947, es una republica islamica que fa partida dei poissanças regionalas de la region gràcias a una populacion de mai de 200 milions d'abitants e una armada nombrosa dotada de l'arma nucleara. Islamabad es la capitala del país, mentre que Karachi forma la vila mai poplada e centre economic. L'islam sunita es la religion d'Estat. Lo gentilici es paquistanés -esa.

Paquistan es centrat sus la vau dau fluvi Indus, una zòna agricòla druda qu'es un centre ancian de civilizacion. Region nòrd-oèst de la Peninsula Indiana, es istoricament pus vulnerable ais invasions e ais influéncias en provenància dau rèsta d'Asia Centrala e d'Orient Mejan. Lo territòri paquistanés foguèt ansin rapidament islamizat durant la conquista musulmana deis Índias. Aquò entraïnèt pauc a pauc l'aparicion de diferéncias culturalas amb lo rèsta dau soscontinent onte l'islam èra pus minoritari. Durant lo sègle XX^en, l'oposicion a la colonizacion britanica si doblèt donc d'una oposicion ais ambicions politicas de la majoritat indó. En 1947-1948, aquò menèt au partiment deis Índias Britanicas entre Índia, en majoritat indoïsta, e Paquistan, en majoritat musulman. En 1971, la mitat orientala de Paquistan si revoutèt e venguèt independenta per formar lo Bangladèsh actuau. Aquela pèrda territòriala entraïnèt una crisi en Paquistan. Una dictatura militara islamizèt lo país e chausissèt de venir l'aliat de referéncia deis Estats Units per luchar còntra lo comunisme dins la region. Dins aquò, en despiech de son ròtne dins lei guèrras menadas en Afganistan, la diplomacia paquistanesa demòra concentrada sus lo conflicte còntra Índia per lo contraròtle de Cachemir.