Maus (Computer)

D Muus isch eins vo de wichtigste Iigobegrät (Inputgrät) vo modärne Computer.
Die grafische Benutzeroberflächene hai sich vor allem Dank dr Muus chönne entwiggle, wo intuitiv cha bruucht wärde und dank ihrem niidrige Briis wiit verbreitet isch.

D Bewegig vo dr Muus (normalerwiis mit dr Hand) uf em Disch oder uf ere spezielle Underlag, ere Muusmatte (Muuspad), wird über e Sensor in dr Muus ufgno, digitalisiert und über e Schnittstell an dr agschlosse Computer überdrait. Über Funktione vom Bedriibssystem wird die zweidimensionali Bewegigsinformation in e gliichartigi Bewegig vom Muuszaiger (Cursor) uf em Bildschirm umgsetzt. Mit Daste oder zuesätzlige Elemänt vo dr Muus cha dr Nutzer verschiidnigi Aktione im Betriibssystem oder Aawändigsprogramm usfüehre. D Iifüehrig vo dr Computermuus cha as en entscheidende Durchbruch in dr Verbesserig vo dr Benutzerfründlikeit vo Computer agluegt wärde. Im Johr 2005 si schätzigswiis scho meh as e Milliarde Müüs wältwiit verchauft worde.

Sit bald zwei Johrzähnt isch d Muus für fast alli Computertätigkeite zsämme mit em Bildschirm (Monitor) und dr Tastatur eini vo de wichtigste Mensch-Maschine-Schnittstelle.