Marshall Islands

Marsal kanatal(馬紹爾群島) kapolongan kitakit (Marsal sowal: Aolepān Aorōkin M̧ajeļ, Inkilis: Republic of the Marshall Islands) a pipangangan to Marsal kanatal, Marsal (Inkilis: Marshall Islands), itiniay i no’amisan Taypinyang a kanatanatal masakitakit. Marsal kanatal i salaloma’ay no Mikelonisiya a kanatanatal, o dadfahal no sera 181 pinfang kongli, o dadahal no riyar mata’elif ko 200 pinfang kongli, 68,480 ko tamdaw, malopisak a maro’ i 1,156 a kanatal safinacadan to 34 i karakaratan. Kasafiyaw no riyar a pala ka’amis o Wike kanatal, katimol o Nolo a kanatal, ka’etip o Mikelonisiya kasakitakit ato kawali katimol a Cilipas. O taliyok no masakaratay a pala alomanay tamdaw i o Maciwlo, o tadaniyaro’ no Marsal kanatal.

I ’ayaw no 2000 no mihecaan i, o Mikelonisiya a tamdaw matatoor tayni i Marsal kanatal a maro’, pakaynien nangra i nano kilangan a piwikwik to manawnaway a salil ko kasa laed no kanatal a romakat. Elopiya a tamdaw i 16 sici to 20 mihecaan pakanengneng to Marsal kanatal, Sepaniya a misolapay a cefang ci Alongso Salasar i 1526 miheca 8 folad nai riyar pakanengneng tina masaliyokay a kanatal.

Rikor roma a Sepaniya ato Inkilis a misolapay pakanengneng tina kanatal. Marsal kanatal a ngangan nai Inkilis a misolapay ci Yohani Marsal. 1871 miheca, Marsal kanatal mala no Sepaniya a waliay a Into a kanatal. 1884 miheca oni a kanatal mapa’aca i Toic, i 1885 miheca mala no Toic a Sinciniya a todong.

Saka 1 kalalood no hekal macalap no Dipong kina Marsal kanatal, i 1919 miheca o kalokitakit lakapot laheci patoror to Dipong, nanoya o Marsal kanatal i notimolan Taypinyang (Nan-yo) no Dipong ko mikowanay. Saka 2 kalalood, itiya kalalood i Cierpot ato Marsal kanatal macalap no Amilika, itiya tinakanatal o liyok no kanatal a Pikini kinapinapina pikingkiwan to adihayay temera, saka makari’ang ko caayay ko mapalolol kakari’ang no pala. Ikor no kalalood, Marsal kanatal ato romaroma a kanatal i Taypinyang malecad o mikowanan no Amilika a kasakanatal i Taypinyang. 1979 miheca Marsal kanatal midemak to niya a salongoc, i 1986 miheca ato Amilika matatilid to “Mapakoniraay kapolongan a katatelek” a citodong to sapikowan.

Marsal kanatal o cecayay a congtong a tapang ko polongay kitakit, milecad to no Amilika mapakoniraay kapolongan kalacalay. Padamso ko Amilika to Marsal kanatal to sakihadimel a hitay, misasorot ato Sakarihaday no Kalotamdaw. Nawhani kinaira no kanatal cango’otay, orasaka o kicay no Marsal kanatal dengan o patadoay ato mifotingay ato maomahay.

O sakacikarapoy no kitakit o nipadamaan no Amilika. Marsal kanatal o no Amilika a payso ko niya a payso. Marsal kanatal a tamdaw o no Marsal ngasaw ko dotoc, caay kapapina nai Filipin ato roma a kanatal no Taypinyang. Tosa ko sowal no kitakit o Marsal ato Amilika sowal ko nisowalan no Marsal kanatal kitakit. Polong no finawlan a pitooran i, 4/3 a finawlan micomod to kapolongan Keristo kiwkay- Marsal kanatal konglihuy (UCCCMI) ato Sencawhuy.