UN-Sekretariat

S UN-Sekretariat (franz. Secrétariat de l'ONU, ängl. United Nations Secretariat) isch s wichtigste Administrationsorgan vo de Vereinte Natione und het näbe sim Hauptsitz z New York drei Ussestelle z Gämf, z Nairobi und z Wien. Sini wichtigsti Ufgoob isch die organisatorischi Understützig vo de andere UN-Organ. Drzue ghört under anderem d Organisation vo Komferänze, s Verfasse vo Studie bzw. Bricht, und d Ufstellig vom Huushaltblan. Für zum die Ufgoobe z bewältige, beschäftige die Vereinte Natione 8.900 Mitarbeiter us 192 Mitgliidstaate (Stand Januar 2009).

Dr UN-Generalsekretär (seit 2017 dr António Guterres) wird uf Vorschlag vom Sicherheitsroot vo dr Generalversammlig für en Amtszit vo fümf Johr gwehlt. Er spiilt innerhalb vo dr UN e bsundrigi Rolle: wil er hüfig in de Medie erschiint, isch er dr „Chopf vo de Vereinte Natione“ und ihr wichtigste Repräsentant.

Ändi 1997 het dr Generalsekretär Kofi Annan d Position vom Stellverdrätende Generalsekretär vo de Vereinte Natione (ängl. Deputy Secretary-General of the United Nations) errichdet, wo seit 2017 vo dr Amina J. Mohammed bsetzt isch.

Bedütendi Positione im Büro vom Generalsekretär (OSG) si dr Chef vom Exekutivbüro (änglisch/französisch: Chef de Cabinet), sit 2017 isch das d Maria L. R. Viotti aus Brasilie, und d Assistänte vom Generalsekretär (ängl. Executive Assistants).