Ragout

Ragùù ([ʀa'gu], vom französisch Ragoût un ragoûter, „dè Gaumè reizè odder kützlè, è Hüngerle machè“), i de Schwyz hüüffig Pfäffer, z Dütschland au Würzfleisch, isch è Art vo Gricht für geschmorts gwürflets Fleisch-, Gflügel-, Wildbrèt- odder au Gemüèseschtüggle in èrè pikantè, oft sämigè Sòßè. Für Ragùùs wörred wiè bi Gulasch Fleischschtugg mit höcherem Aadeil a Binde- un Fettgweeb bruucht, s Fleisch darf im Gegèsatz zuè Gulasch au Knorpel- un Knochèdeile enthaaltè. Bi dè Zuèbereitig von èm Ragùù wörred zèrscht d Fleischwürfel aabrõtè un aaschlièßend d Zwibblè dezuègää, bi Gulasch isch d Reièfolg umkeert. Ragùùs uss bsunders stark zämmègschnittènè Zuètatè heißèd Haschee.

Byschpill sin d Vorschpiisè dütsches Ragoût fin, d schwizer Vorèssè-Variationè, Frikassee, s italiènische Ragù alla bolognese odder Rindsragùù à la bourguignonne.

Bim wyßè Ragùù odder Blankett (vom französischè blanc = wyß) wörd meischtens hells Fleisch wiè Huèn, Kalb odder Haas zèrscht èllei odder mit Suppègrüè kochèd un uss dè broduzyrtè Brüè è wyßi Sòßè zuèbreitet, wo mit Mèèlschwitzi bundè un mit Eigääl un Rahm legyrt wörd. S entschtòt è hells, zimli milds Gricht mit vill Sòßè.