Autobiografie

En Autobiografii (vo griechisch αὐτός autós «sälber»; βίος bíos «Läbe»; γράφειν gráphein «schriibe, beschriibe») isch d Beschriibig vo dr äigene Läbensgschicht oder vo Abschnitt drus us dr Retrospektive.

Im Geegesatz derzue schribt me im Daagebuech laufend, was me grad erläbt het. S Bsundere bi beidne literarische Forme bestoot drin, ass dr Autor und dr Verzeler und dr Protagonist idäntisch si.

Explizit isch d Perspektive vo dr Autobiografii subjektiv, aber im Allgemäine het si e gröössere Aaspruch uf Objektivität as anderi fikzionaali Gattige vo dr Litratur, wie öbbe dr (autobiografischi) Roman. Si het au Elimänt vo de Memuare, wo grundsetzlig sterker druf usgrichdet si, darzstelle und au zämefassend z würdige, was in ere bestimmte Zit bassiert isch.

D Autobiografii stoot an dr Gränze vo Gschicht und Litratur. Si isch eso in ere literarische Randposizioon, und mit iirer Hilf wärde au Deil vo dr Literaturwüsseschaft nöi definiert (öbbe vom Paul de Man). Und si ghört au zu de Kwellegattige vo dr Gschicht.

Bischpiil:

• Sophie Haemmerli-Marti: Mis Aargäu. Land und Lüt us miner Läbensgschicht (1939)
• Thomas Platter: Lebensbeschreibung (2008)