Reconquista

D Reconquista ([rekoŋˈkista] bzw. [ʁəkõŋˈkiʃtɐ], kastilisch und portugiisisch „Zruggeroberig“, katalanisch reconquesta [rekoŋˡkesta] bzw. [rəkuŋˡkestə], dütsch sälte Rekonquista, arabisch الاسترداد‎ al-ʼIstirdād ‚Wiidereroberig‘) isch die spanischi und portugiisischi Bezäichnig für d Zruggeroberig vo dr Iberische Halbinsle dur die christlige Noochkomme vo dr Bevölkerig vom Westgoteriich. In dr Zit vo 711 bis 719 häi muslimischi Erooberer us Nordafrika – Araber und Berber – s Westgoteriich vernichdet und fast die ganzi Iberischi Halbinsle erooberet as Däil vo dr Islamische Expansion. 718 het e Rebellion vo Christe gege die muslimischi Herrschaft in Asturie aagfange und mit ere d Reconquista. D Reconquista isch im Joor 1492 z Änd gange, wo s Emirat vo Granada as dr letscht muslimisch Staat gfalle isch, und d Verdriibig vo de Juude us Spanie aagfange het.^[1]

Dr Begriff Reconquista isch im Middelalter uf dr Iberische Halbinsle nonig verwändet worde; er isch erst in dr Nöizit vo dr französische Forschig iigfüert worde und isch denn au in dr spanische Gschichtsschriibig brucht worde.^[2] Mä dänggt, ass dr Begriff im Joor 1080 zum erste Mol vom portugiisische Mozaraber Sesnando Davides in sine strategische Ufzäichnige brucht worde isch.^[3]

Die ganzi Epoche vo dr Reconquista isch nit nume vo dr Usenandersetzig zwüschen Christe und Muslime brägt gsi, sondern in wite Däil au vo Komflikt innerhalb vo de bäide Laager, mänggisch mit Verbündete vo dr andere Site.

1. ↑ Leo Trepp: Die Rückeroberung Spaniens durch die Christen – Die Inquisition. In: Die Juden; Volk, Geschichte, Religion. Hamburg 1999, ISBN 3499 606186, S. 61/62.
2. ↑ Odilo Engels: Reconquista und Landesherrschaft. Paderborn 1989, S. 279.
3. ↑ www.eduscol.education.fr, abgrüeft am 12. Novämber 2012.