Piga

Una piga^{[1][nota 1]} u peca^[1] (d'o latín pīca, en terminolochía dermatolochica efelide^[1] d'o griego ἐφηλίς) ye una acumulación pigmentaria de melanina que gosa apareixer en a piel, mes que mes, en gran numero en as personas de fenotipo cutanio claro, en arias concretas d'o cuerpo como pueden estar a cara, os huembros u o peito. En l'Alto Aragón a sobén se dicen per o nombre en deminutivo, "piguetas", cuan son de diametro chicot u se'n troba muitas chuntas en una zona concreta d'a piel (por eixemplo en a cara) fendo-se ansinas una distinción con as que son de mida mes grandiza y se troban anisolatas que reciben o nombre de pigas.

A predesposición a tener-ne ye chenetica, y s'ha quiesto relacionar-la con a presancia d'una variant d'o chen d'o receptor d'a melanocortina-1, MC1R. Amaneixen con a exposición a lo sol en as personas con a dita variant chenica, en seguindo lo mesmo proceso que en a producción de moreno común en a resta d'as personas.

Apareixen en os ninos, persistindo en a mayoría d'a vida, y se gosan ausudir con os anyos, con tendencia a desapareixer en as personas d'a tercera edat. L'adchectivo que s'aplica en as personas con picas ye "pecatudo"^{[1][nota 2]}, "pecatoso"^{[1][nota 3]} u "pigalloso"^[1], u tamién "picuto" u "pecuto",^[2] anque se fa lochico pensar que en as variants dialectals aragonesas que sonorizan as consonants oclusivas xordas intervocalicas i podese estar "pecudo" y "picudo",^{[nota 4]} u dica "pigudo"^{[nota 5]} en as zonas en dó que se i diz "piga".

Os animals que presentan pigmentación moteyata tamién se gosa decir que son "pigallaus"^{[1][nota 6]} u "pigaus"^[1].

1. ↑ ^{1,0 1,1 1,2 1,3 1,4 1,5 1,6 1,7} (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (es) ELCOCK, William Dennis, Algunas afinidades fonéticas entre el aragonés y el bearnés (traducción de l'orichinal de 1938); Xordica Editorial. Zaragoza, 2005. ISBN 978-84-96457-09-5

Error en a cita: Existen etiquetas <ref> ta un grupo clamau "nota", pero no se trobó garra etiqueta <references group="nota"/>