Westsahara

D Westsahara (schbanisch Sahara Occidental) isch e Territorium an dr Atlantikküste vo Nordwestafrika, wo noch em Abzug vo dr ehemolige Kolonialmacht Spanie vo Marokko beaasprucht und zum grösste Deil bsetzt worden isch. Marokko luegt das Gebiet, wo in dr vorkoloniale Zit vo ihm e bitzeli abhängig gsi isch, as Deil vo sim Territorium. D „Befreijigsfront“ vo de Sahrauis (dr Bevölkerig vo dr Westsahara), dr Frente Polisario wo scho in dr spanische Kolonialzit entstande und ursprünglig kommunistisch orientiert gsi isch, kämpft für en unabhängige Staat, die Demokratischi Arabischi Republik Sahara, uf em ganze Territorium vo Westsahara. Sit em Waffestillstand vo 1991 het d Frente Polisario d Kontrolle über en Oste vo Westsahara (lueg d Charte). Die Vereinte Natione verlange, ass e Referendum über en endgültig völkerrächtlig Status vom Gebiet duuregfüehrt wurd. Über d Modalidäte für sone Abstimmig si sich Marokko und d Frente Polisario nonig einig worde.